Dövlət ümumi təhsil müəssisələrində çalışan müəllimlərin sertifikatlaşdırılması prosesi ilk dəfə 2022-ci ildə start götürüb.
Cari 2026-cı ildə isə sertifikasiya imtahanlarının test mərhələsinib iyunun 17-19-u və 23-25-i tarixlərində keçirilməsi planlaşdırılır. Növbəti sertifikatlaşdırmaya təsviri incəsənət, musiqi, texnologiya, tarix, fiziki tərbiyə, həmçinin ibtidai sinif, riyaziyyat, Azərbaycan dili və ədəbiyyatı və digər fənn müəllimləri cəlb olunacaq.
Ümumilikdə indiyədək sertifikatlaşdırma prosesinə 80 mindən çox müəllim cəlb olunub. Yekun mərhələlərdə ilk dəfə imtahan verən müəllimlərin sayı ilə birlikdə bu rəqəmin 100 mini ötməsi gözlənilir.
Qeyd edək ki, hazırda sertifikasiyaya ancaq ümumi təhsil müəssisələrində çalışan müəllimlər cəlb olunur. Azərbaycanın dövlət və qeyri-dövlət ali təhsil müəssisələrində təxminən 15 000 – 16 000 civarında professor-müəllim heyəti çalışır.
Bugünlərdə Azərbaycan Dövlət İqtisad Universitetinin (UNEC) rektoru, professor Ədalət Muradov bildirib ki, ingilis dilində dərs deyən müəllimlərə çox, Azərbaycan dilində dərs deyənlərə isə az maaş verilir:
“Düşünürük ki, bu yanaşma tamamilə səhv idi və dəyişməlidir. İngilis dili müəllimlərimizə gəlincə, demək olar ki, hamısı sertifikatlıdır. Çox az sayda müəllimimizin sertifikatı yoxdur. Onların ingilis dili səviyyəsi kifayət qədər yüksəkdir. Mən əminəm ki, ölkəmizdə ingilis dili səviyyəsi üzrə ən güclü kafedralardan biri məhz bizim ingilis dili kafedramızdır.
Bu ildən etibarən yeni bir qayda tətbiq edirik. Birinci kursda tələbəyə dərs deməyə başlayan müəllim ikinci kursun sonunda yenidən imtahan verəcək, özünü inkişaf etdirəcək. Biz bu proses vasitəsilə müəllimlərin yekun nəticələrini də qiymətləndirəcəyik".
Ümumiyyətlə, son illər biliyindən asılı olmayaraq, ali təhsil müəssisələrində tədrislə məşğul olan müəllim heyətinin sayı artıb. Eyni zamanda, bəzi ali təhsil müəssisələri var ki, orada tələbələr ancaq diplom xatirinə təhsil alırlar. Yəni keyfiyyətli tədris olmadığına görə məzunların bilik və bacarıqları da əmək bazarının bugünki tələblərinə cavab vermir.
Bu il ümumtəhsil məktəblərində sertifikasiya mərhələsinin başa çatacağını nəzərə alsaq, universitet müəllimləri üçün sertifikasiya imtahanı tətbiq edilə bilərmi?
Referans Media xəbər verir ki ,məsələ ilə bağlı təhsil üzrə ekspert Elçin Əfəndi “Cebheinfo.az”-a bildirib ki, Azərbaycan Dövlət İqtisad Universiteti daim həm müəllim-professor heyətinin inkişafı istiqamətində qərarlar qəbul edilir, o cümlədən ümumtəhsil və akademik göstəricilərin yüksəlməsi ilə bağlı müvafiq yeniliklərə imza atır:
“Bu alınmış qərar da düşünürəm ki, akademik göstəricilərə müsbət mənada təsir göstərəcək. Ümumiyyətlə, təhsilverənlərin öz üzərində işləməsi, bilik və bacarıqlarını daha da yaxşılaşdırması üçün mövcud əsrdə onların müntəzəm olaraq yoxlanılması bir növ zərurətə çevrilib. Çünki hər keçən gün yeniliklər baş verir.
Həmin yeniliklərlə də ayaqlaşmaq vacibdir. Bu baxımdan, növbəti mərhələdə biz tam və orta ümumtəhsil müəssisələrində sertifikasiya prosesini bitirdikdən sonra Elm və Ali Təhsil üzrə Dövlət Agentliyi tərəfindən növbəti mərhələdə ali təhsil müəssisələrində dərs deyən professor-müəllim heyətinin də sertifikasiya prosesinə cəlb olunması, diaqnostika, attestasiya, akkreditasiya kimi adlar altında onların bilik və bacarıqlarının ölçülməsi zərurətə çevrilir”.
Ekspertin sözlərinə görə, hazırda əksər universitetlərdə müəllim-professor heyəti yaşlı nəslin nümayəndəsidir, onların bilik və bacarıqlarından, təcrübələrindən istifadə etmək olar:
“Ancaq bəzi məqamlarda görürük ki, onların İKT bilikləri yüksək deyil. Bu, hazırda zəruri bilik hesab olunur.
O cümlədən, mövcud çağırışlara, müasir təhsil standartıarına cavab vermələri mütləq yoxlanılmalıdır ki, ümumilikdə təhsil alanların, tələbələrin akademik göstəricilərinə müsbət töhfə vermiş olsunlar.
Əgər bunlara cavab vermirlərsə, o zaman onların yerlərini yeni gənc nəsil tutmalıdır. Gənc müəllim heyəti prosesə cəlb olunmalıdır”.
