ABŞ-ın ən vacib iki şəxsinin – dövlət katibi Marko Rubio və müdafiə naziri Pit Heqetin yaşadığı Fort MakNeyr hərbi bazası üzərində müşahidə edilən sirli dronlar Pentaqonu və Ağ Evi yüksək hazırlıq vəziyyətinə gətirib. Bir gecə ilə məhdudlaşmayan dron fəaliyyəti səbəbindən Ağ Evdə “təcili cavab” gündəliyi ilə bağlı iclas keçirilib və strateji bazalarda təhlükəsizlik səviyyəsi “konkret hücum kəşfiyyatı” mənasını verən “Çarli” səviyyəsinə qaldırıldı.
Referans Media xəbər verir ki, ABŞ administrasiyasını sarsıdan təhlükəsizlik böhranı paytaxtın mərkəzindəki Fort Lesley J. MakNeyr hərbi bazasının üstündəki səmada başladı. “Washington Post” qəzetində dərc olunan xəbərə görə, son 10 gündə ABŞ dövlət katibi Marko Rubio və müdafiə naziri Pete Hegsetin də yaşadığı baza üzərində çoxsaylı naməlum dronlar aşkar edilib.
Həssas təhlükəsizlik protokollarına görə adının çəkilməsini istəməyən yüksək vəzifəli bir məmur, dron fəaliyyətinin tək bir gecə ilə məhdudlaşmadığını və vəziyyətin ciddiliyinə görə Ağ Evdə “təcili cavab” iclasının keçirildiyini bildirib.
Bu sirli uçuşlar ABŞ-ın İrana qarşı əməliyyatları və İsrailin bölgədəki hücumlarından qaynaqlanan artan gərginliyin ABŞ ərazisinə yayıldığına dair narahatlıqlar yaratdı. “The Washington Post” qəzeti Nyu-Cersi ştatındakı Makquir-Diks-Leykherst və Florida ştatındakı MakDill kimi strateji bazalarda təhlükəsizlik səviyyəsinin “Çarli”yə qaldırıldığını bildirib. Bu səviyyə Deltadan əvvəlki son dayanacaq, ən yüksək həyəcan səviyyəsi kimi tanınır, yəni ordunun “qarşıdan gələn hücum haqqında konkret kəşfiyyat məlumatları” var.
Müdafiə Nazirliyinin sözçüsü Şon Parnell məsələ ilə bağlı sualları cavablandırmaqdan imtina edib və yalnız nazirliklərin fəaliyyət planları barədə məlumat verilməsini “məsuliyyətsiz” adlandırıb.
Ənənəvi olaraq siyasi fiqurların qaldığı yer olmayan Fort MakNeyr, təhlükəsizliklə bağlı narahatlıqlar səbəbindən Tramp administrasiyası dövründə yüksək vəzifəli bürokratlar üçün sığınacağa çevrilmişdi.
