ABŞ prezidenti Donald Tramp, İranın irəli sürdüyü “sürətli sülh” planını yetərsiz hesab edib. Ağ Evdə keçirilən qapalı iclasda müzakirə olunan təklif Vaşinqton tərəfindən əsasən nüvə proqramını əhatə etmədiyi üçün qəbul olunmayıb.
Referans Media xəbər verir ki, İran Hörmüz boğazının yenidən açılması üçün ABŞ-ın dəniz blokadasını dayandırmasını və müharibənin sonlandırılmasını şərt kimi irəli sürüb. Nüvə proqramı məsələsinin isə daha sonraya saxlanılması təklif olunub.
Lakin ABŞ administrasiyası bu yanaşmanı qəbul etməyib və nüvə fəaliyyətlərinin razılaşmanın mərkəzində dayanmalı olduğunu vurğulayıb.
ABŞ mediasına sızan məlumatlara görə, Tramp vəziyyəti qiymətləndirərkən təklifdən narazı qaldığını açıq şəkildə bildirib. Vaşinqton üçün əsas “qırmızı xətt” İranın mümkün nüvə silahı potensialıdır.
ABŞ tərəfi hesab edir ki, nüvə məsələsi kənarda qalarsa, hər hansı razılaşma dayanıqlı olmayacaq. İran isə mərhələli yanaşmanı üstün tutaraq əvvəlcə hərbi gərginliyin azaldılmasını hədəfləyir.
Hörmüz boğazında yaranan qeyri-müəyyənlik dünya enerji bazarlarına da təsir göstərməkdə davam edir. Qlobal neft tədarükünün təxminən 20%-nin keçdiyi bu strateji xəttdə risklərin artması, qiymətlərin yüksəlməsinə və təchizat zəncirində gərginliyə səbəb olur.
Diplomatik təmaslar davam etsə də, tərəflər arasındakı əsas fikir ayrılığı – xüsusilə nüvə proqramı ilə bağlı mövqe fərqi – yaxın zamanda kompromis əldə olunmasını çətinləşdirir.
