“Fənərbaxça”nın ispaniyalı futbolçusu Marko Asensio ilə bağlı diqqətçəkən iddia gündəmə gəlib. İddialara görə, futbolçunun zədə səbəbindən matçın iştirak ərizəsindən çıxarılmasının arxasında komanda daxilində yaranan gərginlik dayana bilər.
Referans Media xəbər verir ki, Asensio İstanbulda keçirilən son məşqin bütün hissəsində komanda ilə birlikdə çalışıb və İngiltərəyə yollanan heyətdə yer alıb. Lakin matç günü zədə səbəbindən qarşılaşmada iştirak etməyəcəyi açıqlanıb.
İddialara görə, gərginlik matça bir neçə saat qalmış başlayıb. Baş məşqçilər korpusunun müəyyənləşdirdiyi heyətdə ilk “11-lik”də yer almayacağını və qarşılaşmaya ehtiyat oyunçular skamyasında başlayacağını öyrənən Asensionun bu qərara etiraz etdiyi bildirilir.
Məlumatda qeyd olunur ki, ispaniyalı futbolçu ehtiyatda qalacağını bildikdən sonra zədəsini əsas gətirərək oyunda iştirak etmək istəmədiyini çatdırıb və nəticədə matçın iştirak ərizəsinə daxil edilməyib. Lakin bu iddiaların doğruluğu təqdim olunan məlumatda müstəqil şəkildə təsdiqlənməyib.
Marko Asensio cari mövsümdə bütün turnirlərdə 8 oyuna çıxıb. O, bu qarşılaşmalarda 2 qol vurub və 1 məhsuldar ötürmə ilə yadda qalıb.
