Yaxın Şərqdə neft daşımalarının normallaşmağa başlaması və Hörmüz boğazından keçən neftin həcminin müharibədən əvvəlki səviyyəyə yaxınlaşması dünya bazarında qiymətlərin enməsinə səbəb olub.
Referans Media xəbər verir ki, qlobal enerji bazarlarında təklif çatışmazlığı ilə bağlı narahatlıqların azalması fonunda “Brent” markalı neftin bir barelinin qiyməti 95,37 dollara, ABŞ xam neftinin qiyməti isə 88,33 dollara düşüb.
Məlumata görə, Yaxın Şərqdə baş verən münaqişələr səbəbindən enerji bazarlarında yaranan qeyri-müəyyənlik neft daşımalarının bərpası ilə tədricən zəifləyir. Dünya neft ticarətində strateji əhəmiyyət daşıyan Hörmüz boğazından keçən neftin həcminin əvvəlki səviyyələrə yaxınlaşması bazarda təklifin azalacağı ilə bağlı ehtimalları zəiflədib.
Beynəlxalq Enerji Agentliyinin proqnozu dəyişib
Neft qiymətlərinin enməsinə təsir göstərən digər amil Beynəlxalq Enerji Agentliyinin (IEA) qlobal tələb və təklif balansı ilə bağlı yenilənmiş proqnozu olub.
Agentlik əvvəlki gözləntilərindən fərqli olaraq, ilin son üç ayında dünya bazarında neft profisiti yaranacağını proqnozlaşdırır. Hesablamalara əsasən, gündəlik qlobal neft təklifinin 105 milyon barelə çatacağı gözlənilir. Bu isə gündəlik tələbatdan təxminən 1,7 milyon barel çoxdur.
Beləliklə, bazarda əvvəlki dövrdə ön plana çıxan mümkün neft qıtlığı narahatlıqlarını təklif artımı ehtimalı əvəz etməyə başlayıb.
Ehtiyatlardan əlavə 71 milyon barel neft çıxarılacaq
Beynəlxalq Enerji Agentliyi fövqəladə neft ehtiyatlarından fevralın sonunadək 71 milyon barelin bazara çıxarılacağını da açıqlayıb.
Əlavə neft həcminin qlobal təklifi dəstəkləyərək enerji bazarındakı gərginliyi azaltması gözlənilir.
Agentliyin neft çatışmazlığı proqnozundan təklif artıqlığı gözləntisinə keçməsi dünya enerji bazarında vəziyyətin qısa müddətdə dəyişdiyini göstərir.
