Qəmər Hüseyn qızı Abbasquliyeva
Rusiyanın Sankt-Peterburq şəhərində yaşayan soydaşımız Qəmər Hüseyn qızı Abbasquliyeva ali təhsilli pedaqoq və psixoloqdur. O,
hazırda klinik psixoloq kimi fəaliyyət göstərir. Dünyanın ən böyük elmi və mədəni mərkəzlərindən biri olan Sankt-Peterburqda bilik
və zəhmətlə tanınmaq heç də asan deyil. Lakin Qəmər xanım bu çətin mühitdə peşəkarlığı, insanpərvərliyi və çalışqanlığı ilə
seçilərək həm öz adını, həm də xalqımızın adını ucaldır.
Onunla söhbət edən insan bir növ mənəvi yüngüllük, daxili rahatlıq hiss edir. Sanki illərlə insanı narahat edən psixoloji gərginliklər,
ağrılı düşüncələr sadəcə bir söhbət boyu çözülür. Qəmər xanımın səsi, baxışı və yanaşması insana güvən, arxayınlıq və həyat eşqi
aşılayır.
Klinik psixologiya müasir dövrdə ən vacib sahələrdən biridir. Bu gün bəşəriyyət münaqişələr, müharibələr, iqtisadi və sosial
təlatümlər içində dərin sarsıntılar yaşayır. Qlobal dəyişikliklərin təsiri birbaşa insana – onun ruhuna və psixologiyasına yönəlir.
İnsanların bu sarsıntılara dözümlülüyü fərqlidir: bəziləri sakit qalmağı bacarır, bəziləri isə ağır stress və gərginlikdən çıxış yolu tapa
bilmir. Belə məqamlarda sadəcə təsəlli deyil, elmi əsaslara söykənən peşəkar psixoloji yardım həyati əhəmiyyət daşıyır.
Qəmər Abbasquliyeva kimi mütəxəssislərin fəaliyyəti məhz bu nöqtədə dəyər qazanır. O, beynəlxalq psixoloji məktəblərin son elmi
yeniliklərinə əsaslanaraq pasiyentlərinə fərdi yanaşma metodologiyası tətbiq edir. Bu yanaşma onun peşəkar uğurlarının əsas
açarıdır.
Qəmər xanım Azərbaycandan uzaqda yaşasa da, qəlbi həmişə doğma Vətənlə döyünür. O, fəaliyyətinin bir istiqamətini də
Azərbaycanla bağlamağı planlaşdırır. Onun ən böyük arzularından biri — Bakı şəhərində şəhid ailələrinə, müharibə veteranlarına
və döyüşlərin ağır psixoloji təsirindən əziyyət çəkən insanlara təmənnasız psixoloji yardım göstərməkdir. Bu məqsədini
reallaşdırmaq üçün o, ardıcıl və məqsədyönlü şəkildə çalışır.
Arzuları böyük, məqsədləri aydın olan bu istedadlı mütəxəssisə işində bol uğurlar arzulayırıq. Onun tükənməz enerjisi, iradəsi və
humanizmi hər bir soydaşımız üçün nümunədir. Xaricdə yaşayan həmvətənlərimizin uğurları, onların Azərbaycan adını ucaldan
fəaliyyəti bizim üçün qürur mənbəyidir.
Bizim borcumuz belə fədakar, nümunəvi soydaşlarımızı tanıtmaq və onlara mənəvi dəstək olmaqdır.
Qəmər Hüseyn qızı Abbasquliyeva – Rusiyada fəaliyyət göstərən klinik psixoloq.
Bu adı yadda saxlayın, paylaşın, tövsiyə edin.
Soydaşımıza dəstək olaq, öz dəyərlərimizi ucaldaq ki, dünya da bizi tanısın və dəyərləndirsin.
✍️ Sima Babayeva
