Yeni reallıqların memarı olan Azərbaycan Mediası və Dövlət iradəsi Azərbaycan Respublikasının Prezidenti cənab İlham Əliyevin son çıxışında səsləndirdiyi fikirlər, əslində, yeni dövrün siyasi fəlsəfəsini, milli media strategiyasını və ərazi bütövlüyü uğrunda aparılan yenidənqurma hərəkatının ideoloji əsaslarını aydın şəkildə ortaya qoyur. Bu çıxış həm dərin dövlətçilik düşüncəsinin, həm strateji idarəçilik modelinin, həm də müasir informasiya cəmiyyətində Azərbaycanın mövqeyinin göstəricisidir.
Azərbaycan mediasının milli və beynəlxalq informasiya məkanında artan gücü və “Böyük Qayıdış” proqramı çərçivəsində Qarabağ və Şərqi Zəngəzurda həyata keçirilən möhtəşəm quruculuq prosesləri. Bu iki istiqamət bir-birindən ayrılmaz şəkildə milli maraqları qoruma missiyasını yerinə yetirir. Çünki informasiya dövründə media artıq təkcə xəbəri yayan yox, dövlət mövqeyini formalaşdıran strateji alətə çevrilmişdir. Cənab Prezidentin dediyi kimi, bu gün Azərbaycan mediası yalnız ölkə daxilində deyil, beynəlxalq platformalarda da böyük nüfuz qazanmışdır. Bu, təsadüfi deyil. Uzun illər ərzində informasiya sahəsində aparılan islahatlar, yeni texnoloji imkanlar və jurnalistlərin peşəkarlığı bu nəticəyə gətirib çıxarmışdır.
Prezident İlham Əliyev bunu səmimi şəkildə etiraf edir və qeyd edir ki, bu sözlər jurnalistləri tərifləmək üçün deyil, gerçək vəziyyəti ifadə etmək üçündür. Azərbaycan mediası artıq dövlət maraqlarını qorumaqda, saxta ittihamları ifşa etməkdə və informasiya hücumlarına qarşı cavab verməkdə kifayət qədər təcrübə toplamışdır. Ölkə başçısının “ən yaxşı müdafiə hücumdur” tezisinə münasibəti də bu kontekstdə dəyərlidir. Bəli, informasiya məkanında təkcə reaksiya vermək deyil, həm də təşəbbüs göstərmək, gündəmi müəyyənləşdirmək müasir medianın əsas vəzifələrindən biridir. Prezident İlham Əliyevin vurğuladığı kimi, Azərbaycan mediyası bu gün bir çox ölkələrdə oxunur, təhlil olunur və yayılan məlumatlara əsasən rəsmi mövqeyimizlə bağlı fərziyyələr irəli sürülür. Bu fakt Azərbaycan jurnalistikasının artıq təkcə ölkədaxili deyil, beynəlxalq münasibətlər səviyyəsində də mövcudluğunu təsdiqləyir. Məhz bu səbəbdən media işçilərinin əhatə dairəsinin genişlənməsi, onların beynəlxalq platformalarda fəal iştirakı prioritet məsələyə çevrilməlidir. Bütün bu nailiyyətlərin arxasında isə insanlar – peşəkar jurnalistlər, analitiklər, redaktorlar dayanır.
Prezidentin də qeyd etdiyi kimi, medianı nüfuzlu edən məhz onun əməkdaşlarıdır. Bu fikirlər, əslində, hər bir media əməkdaşının vəzifəsini və məsuliyyətini daha da artırır. Çünki onların işi təkcə informasiya paylaşmaq yox, həm də milli maraqları müdafiə etmək, ictimai rəyə istiqamət verməkdir. Bu gün Azərbaycan elə bir mərhələdədir ki, informasiya ilə yanaşı, real əməllər, fiziki yenidənqurma və dövlət siyasətinin nəticələri də paralel şəkildə inkişaf edir. “Böyük Qayıdış” proqramı bu baxımdan müasir Azərbaycan tarixinin ən əzəmətli layihələrindən biridir. Prezidentin qeyd etdiyi kimi, bu layihəni bir neçə cümlə ilə izah etmək mümkün deyil. Bu proses həm genişmiqyaslı texniki işləri, həm də dərin mənəvi dönüşü əhatə edir. Dörd il ərzində regionda aparılan infrastruktur layihələrinin miqyası tarixi miqyasla ölçülə bilər. Artıq Qarabağ və Şərqi Zəngəzur tam dairəvi elektrik sistemi ilə təmin olunmuşdur. 280 meqavatlıq su elektrik stansiyaları yalnız bölgəni deyil, bütöv Azərbaycanı enerji ilə təmin etməyə qadirdir. Bu, həm iqtisadi, həm də ekoloji baxımdan strateji addımdır. Enerji təhlükəsizliyi suverenliyin vacib komponentlərindən biridir. İnfrastruktur dedikdə yalnız elektrik xətləri deyil, həm də nəqliyyat, su təminatı, rabitə, internet, sosial xidmətlər, səhiyyə və təhsil nəzərdə tutulur. Ağdam-Xankəndi-Şuşa avtomobil yolu üzərində 7 tunelin inşası başa çatmaq üzrədir. Murov dağının altından keçən 11.7 kilometrlik tunel dünya səviyyəsində mühüm mühəndislik layihəsi sayılır. Dəmir yolu xətlərinin bərpası və Xankəndiyə qədər uzadılması həm hərəkət rahatlığını, həm də regionun iqtisadi inteqrasiyasını təmin edəcək. Yaşayış üçün nəzərdə tutulmuş evlərin tikintisi də sürətlə davam edir.
Bu mərhələdən sonra daha çox vəsait məhz məskunlaşmaya yönəldiləcək. Dövlətin strategiyası aydındır: əvvəlcə dayanıqlı infrastruktur, sonra isə davamlı məskunlaşma. Bu model həm effektivdir, həm də vətəndaşlara təhlükəsiz və rahat yaşayış təmin edir. Prezidentin sözləri ilə desək, artıq 18 yaşayış məntəqəsində keçmiş köçkünlər məskunlaşıb. Bu proses davamlı olacaq və hər ay, hər il qayıdanların sayı artacaq. Xankəndidə fəaliyyətə başlayan Qarabağ Universiteti isə bu bölgənin elmi və tədris mərkəzinə çevriləcək. 1500 tələbənin və 300 müəllimin burada fəaliyyəti sosial və intellektual canlanmanın göstəricisidir. Ən əsası isə bu işlərə ruh verən amildir – xalqın iradəsi, sevgisi və bağlılığı. Prezidentin qeyd etdiyi kimi, buraya qayıdan insanlar təkcə iş üçün deyil, ürəklə, sevgi ilə çalışırlar. Qarabağda olmaq, orada yaşamaq, çalışmaq hər bir vətəndaş üçün həm borc, həm də qürur mənbəyidir. “Böyük Qayıdış” – təkcə bir fiziki köç deyil, həm də milli özünüdərk prosesidir. Prezidentin fikirləri bu mənzərəni daha da aydınlaşdırır: bu gün burada çalışan hər bir insan xüsusi coşğu ilə, böyük zövqlə işləyir. Bu isə sırf iqtisadi layihə deyil – bu mənəvi qayıdışdır. Və bu qayıdış xalqın öz dəyərlərinə, tarixinə, kökünə və torpağına olan sarsılmaz bağını nümayiş etdirir. Əgər bu gün Qarabağ “cənnətin kiçik bir parçasıdır” kimi dəyərləndirilirsə, bu, həm də illərlə aparılan siyasətin, göstərilən səbrin və qazanılmış zəfərin nəticəsidir. Bu cənnətin yaranması təkcə fiziki tikililərlə deyil, ruhun və iradənin dirçəlməsi ilə mümkün olmuşdur. Azərbaycan mediası bu prosesi izləyir, sənədləşdirir və dünyaya çatdırır. Media burada sadəcə müşahidəçi deyil – o həm də bu tarixi prosesin bir hissəsidir.
Əgər informasiya düzgün və vaxtında yayılmasa, edilən işlərin qlobal dəyəri görünməz qalar. Məhz buna görə Azərbaycan jurnalistikası həm informasiya cəbhəsində döyüşür, həm də tarixi salnamə yazır. Prezidentin çıxışında vurğulanan fikirlər bir daha təsdiqləyir ki, media və dövlət eyni strategiyanın tərəfdaşlarıdır. Onlar birlikdə həm təhlükəsizlik, həm mənəvi intibah, həm də inkişaf strategiyasını həyata keçirirlər. Bugünkü reallıqlar sabahın zəfərini təmin edən addımlardır. Azərbaycan artıq yeni tarix yazır. Bu tarixdə qələm də var, qayıdan ayaq səsləri də, yüksələn qüllələr də, parlayan lampalar da. Bu tarix həm səsli, həm parlaq, həm də qürurludur. Azərbaycan mediası bu tarixin səsini dünyaya çatdıran güclü mikrofondur. “Böyük Qayıdış” isə bu səsin gücləndiricisi, məzmununun daşıyıcısıdır.
Fərid Mustafayev YAP Yasamal rayon Elm və Təhsil Nazirliyinin Torpaqşünaslıq və Aqrokimya İnstitutu üzrə ərazi partiya təşkilatının sədr müavini
