Regionalizmin ilk dalğası 1950 və 1960-cı illərdə ortaya çıxsa da, bu gün dünyada baş verən proseslər regional əməkdaşlığın zəruri olduğunu bir daha üzə çıxardır. Təbii ki, ilkin mərhələdə regional balans axtarışına cəhd edilməsə heç bir halda irəliləyiş əldə edilə bilməz.
Odur ki, Cənubi Qafqaz regionunda əməkdaşlıq yaradılmalıdır ki, regionumuz illərlə, əsrlərlə yaşadığı, şahidlik etdiyi müharibə və münaqişələrdən uzaq olsun. Regional əməkdaşlıq daha sıx iqtisadi münasibətlər deməkdir. Qarşılıqlı ticarətin sürətləndirilməsi, habelə açıqlıq, mübadilənin intensivləşdirilməsi lazımdır. Söhbət isə səthi inteqrasiyadan getmir. Əsas amal dayanıqlı sülhün əldə edilməsidir. Bu isə yalnız çoxbətərəfli səviyyədə mümkün ola bilər.
Odur ki, konsensusa nail olmaq lazımdır. Maneələrin aradan qaldırılmasına fokuslanmaq zəruridir. Bütün bunlar uyğunsuz yanaşmalardan qaynaqlanan səmərəsizliyin qarşısını alacaq, mümkün əməkdaşlıq sahələrini tapmağa kömək edəcək.
Zəngəzur dəhlizi ilə bağlı cənab Prezident İlham Əliyevin olduqca müdrük bir yanaşması var. Dövlət başçımız bildirir ki, Zəngəzur dəhlizi sülhün fundamental elementlərindən biridir. Bu isə o deməkdir ki, cənab Prezident İlham Əliyev atdığı addımlarla sadəcə Azərbaycanı önə çıxartmır, bütövlükdə Cənubi Qafqazı sülhün əbədi olacağı bir məkana çevirir. Regional əməkdaşlığı təşviq etməklə, habelə bölgəyə xarici investorları cəlb etməklə, bölgəyə beynəlxalq nəzərləri çəkməklə Cənubi Qafqazın iqtisadi mərkəz olması istiqamətində çalışır.
Zəngəzur dəhlizinin reallaşması hər zaman aktualdır, bu daimi olaraq gündəlikdədir. Azərbaycanın evsahibliyi etdiyi WUF13 çərçivəsində bu məsələyə bir daha toxunulması ondan xəbər verir ki, bu, Azərbaycanın xarici siyasətində əsas yerdə dayanır. Layihənin reallaşması bölgəyə iqtisadi dirçəlmə gətirəcəksə, həm də siyasi dividendlər bəxş edəcək. Əsas amil odur ki, bölgə Zəngəzur dəhlizi vasitəsilə beynəlxalq yükdaşımaların əhəmiyyətli bir hissəsinə çevriləcək ki, burada dövlətlər, özəl sektor, habelə fərdi qaydada sadə vətəndaşlar da xeyir götürəcək.
