ABŞ-də tək yaşayan 82 yaşlı Joan Rivet evində yıxıldıqdan sonra 9 gün ərzində vannada köməksiz vəziyyətdə qalıb. Telefonuna çata bilməyən yaşlı qadın ayağı ilə kranı açaraq su içib və bu yolla həyatda qalmağı bacarıb.
Referans Media xəbər verir ki, ABŞ-nin Şimali Karolina ştatında yaşayan 82 yaşlı Joan Rivet evində baş verən bədbəxt hadisədən sonra düz 9 gün vannada köməksiz vəziyyətdə qalıb. Kömək istəyə bilməyən qadın böyük iradə nümayiş etdirərək həyatda qalmağı bacarıb.
Vannaya yıxıldıqdan sonra hərəkət edə bilmədi
2023-cü ildə həyat yoldaşını itirən və tək yaşayan Joan Rivet iyunun 1-i gecəsi yatmağa hazırlaşarkən hamamda müvazinətini itirərək vannaya yıxılıb. Bel nahiyəsindən xəsarət alan qadın vannadan çıxa bilməyib, mobil telefonuna da çata bilməyib. Onun kömək çağırışlarını isə qonşuları eşitməyib.
Ayağı ilə kranı açaraq su içdi
Yaşamaq üçün çıxış yolu axtaran Rivet ayağı ilə su kranını açmağa nail olub. O, axan sudan içərək günlərlə susuz qalmamağa çalışıb. Qadın bildirib ki, bu müddət ərzində bəzən huşunu itirib və davamlı dua edib.
Həyatını bacısının şübhəsi xilas etdi
Joan Rivetlə bir neçə gün əlaqə saxlaya bilməyən bacısı narahat olaraq aidiyyəti qurumlara məlumat verib. Hadisə yerinə gələn xilasedicilər yaşlı qadını vannada yarıhuşsuz vəziyyətdə tapıblar.
Xəstəxanaya çatdırılan Rivetdə ciddi susuzlaşma və uzun müddət eyni vəziyyətdə qalmaqdan qaynaqlanan sağlamlıq problemləri aşkar edilib. Müalicədən sonra o, reabilitasiya mərkəzinə yerləşdirilib.
Yaşadığı hadisədən sonra həyatını yenidən dəyərləndirdiyini deyən Joan Rivet sağaldıqdan sonra ailəsinə daha yaxın olmaq üçün Corciya ştatına köçməyi planlaşdırdığını bildirib.
