Amerika Birləşmiş Ştatları və İran arasında gərginlik dəniz marşrutlarında daha da kəskinləşib. ABŞ tərəfinin açıqlamasına görə, İran neftini daşıyan böyük bir tanker qrupunun hərəkəti Hörmüz boğazı yaxınlığında dayandırılıb və istiqaməti dəyişdirilib.
Referans Media xəbər verir ki, ABŞ Mərkəzi Komandanlığı (CENTCOM) ən az 41 tankerə müdaxilə edildiyini, bu gəmilərdə ümumilikdə təxminən 69 milyon barel xam neftin daşındığını bildirib. Bu həcmdə neftin bazar dəyərinin təxminən 6 milyard dollar olduğu qeyd olunur.
Hadisənin əsasən Hörmüz boğazı bölgəsində baş verdiyi bildirilir. Bu ərazi dünya neft daşımalarının ən kritik nöqtələrindən biri hesab olunur.
ABŞ rəsmiləri bu addımın İranın neft gəlirlərini hədəf alan daha geniş iqtisadi təzyiq strategiyasının tərkib hissəsi olduğunu bildirir. Məqsədin Tehranın enerji ixracından əldə etdiyi valyuta axınını məhdudlaşdırmaq olduğu qeyd edilir.
Beynəlxalq media isə bölgədəki vəziyyətin getdikcə daha gərgin xarakter aldığını və dəniz nəqliyyatında risklərin artdığını yazır. Ekspertlər bu cür müdaxilələrin qlobal enerji bazarına da təsir göstərə biləcəyini vurğulayır.
