Buğda qiymətlərində Yaxın Şərqdəki münaqişəsilə əlaqəli olaraq gübrə tədarükündə yaranan çətinliklər və əlverişsiz hava şəraiti səbəbindən təxminən iki ayın ən böyük həftəlik artımı qeydə alınıb.
ABŞ, Avstraliya, Qara dəniz kənd təsərrüfatı bölgəsinin bəzi hissələrində və Avropa daxil olmaqla mühüm regionlarda müşahidə olunan quraqlıq buğda təklifi gözləntilərinə mənfi təsir göstərib.
Çikaqo Ticarət Birjasındakı buğda fyuçersləri fevral ayından bəri ən böyük sıçrayışı edərək həftəlik müqayisədə təxminən 5% artım göstərib.
Buğdanın qiyməti Çikaqo birjasında 6,07 dollar səviyyəsinə, Kanzas buğdasının qiyməti isə 6,56 dollar səviyyəsinə çatıb. Qarğıdalı və soya da bahalaşıb.
Qlobal bazarda baş verən qiymət artımı Azərbaycan bazarına necə təsir edə bilər?
Referans Media xəbər verir ki ,mövzu ilə bağlı Bizim.Media-ya danışan Liberal İqtisadçılar Mərkəzinin sədri Akif Nəsirli deyib ki, qlobal buğda bahalaşması Azərbaycan bazarına birbaşa təsir edə bilər, çünki ölkə buğdanı xeyli miqdarda idxal edir:
“Çikaqo Ticarət Birjasındakı buğda fyuçersləri fevral ayından bəri ən böyük sıçrayışı edərək həftəlik müqayisədə təxminən 5% artım göstərib. Artımın əsas səbəbləri İran müharibəsi ilə əlaqəli gübrə tədarükündə çətinliklər və ABŞ, Avstraliya, Qara dəniz bölgəsi və Avropada müşahidə olunan quraqlıqdır.
Hörmüz boğazı böyük ölçüdə bağlı qalmağa davam edir ki, bu da enerji və gübrə böhranını uzadır və qlobal miqyasda əsas kənd təsərrüfatı məhsullarının istehsalını təhlükə altına qoyur.
Azərbaycana gəlincə, 2026-cı ilin ilk 3 ayı ərzində ölkəyə 82 milyon 766 min dollar dəyərində 371 min 802 ton buğda idxal olunub. 2025-ci ildə isə ölkəyə 275 milyon 626 min dollar dəyərində 1 milyon 267 min 322 ton buğda idxal edilib.
Bu rəqəmlər göstərir ki, Azərbaycan buğda idxalından güclü şəkildə asılıdır. Birja qiymətlərinin artması idxal xərclərini birbaşa artıracaq ki, bu da un, çörək və digər buğda əsaslı məhsulların qiymətinə zəncirvar şəklində yansıyacaq. Gübrə çatışmazlığı isə yalnız idxal edilən buğdanı deyil, ölkə daxilindəki kənd təsərrüfatı istehsalını da məhdudlaşdıraraq vəziyyəti daha da ağırlaşdıra bilər”.
