Hər gün fincan-fincan içilən çayın rənginin bulanıq, dadının isə acı olması tez-tez rast gəlinən hallardandır. Çayxanalarda təqdim olunan o parlaq, tünd qırmızı və ətirli pürrəngi çayın sirri əslində ev mətbəxlərində edilən sadə bir səhvin aradan qaldırılmasında gizlənir.
Referans Media bildirir ki, çayın dəmlənmə kimyasını dəyişdirən xırda toxunuşlarla mükəmməl dada nail olmaq mümkündür.
İdeal rəng və dad əldə etməyin ilkin şərti suyun temperaturunu düzgün tənzimləməkdir. Qaynar suyun birbaşa quru çay yarpaqlarının üzərinə tökülməsi ən böyük səhvlərdən biridir. Qaynama nöqtəsinə çatmış su çay yarpaqlarını yandıraraq dadın acılaşmasına səbəb olur. Bunun qarşısını almaq üçün əvvəlcə çaydanın alt hissəsində su qaynadılmalı, sonra həmin isti su üst çaydana boşaldılmalı və quru çay yarpaqları suyun üzərinə əlavə edilməlidir. Yarpaqlar suyun səthində qalmalı və zamanla öz-özünə dibə çökməlidir.
Çayın büllur kimi şəffaf olması və ətrini itirməməsi üçün dəmlənmə zamanı çaydanın içərisinə hava daxil olmasının qarşısı alınmalıdır. Üst çaydanın lüləyini kağız salfet və ya xüsusi tıxacla qapamaq ətrin daxildə qalmasını təmin edir. Dəmləmə suyuna bir ədəd qənd və ya 1-2 damcı limon şirəsinin əlavə edilməsi çayın acılığını götürür, ona xüsusi parlaqlıq və tünd qırmızı çalar qazandırır.
Dadın tam oturması üçün dəm alma müddətinə dəqiq riayət edilməlidir. Yarpaqlar suya əlavə olunduqdan sonra ocağın xodu ən aşağı dərəcəyə gətirilməlidir. Çayın ideal dəm alma müddəti 15-20 dəqiqə təşkil edir. Bu müddətdən tez açılan çay xam qalır, 30 dəqiqədən artıq saxlanılan çay isə köhnəlir və dad keyfiyyətini itirir. Yarpaqların hamısı çaydanın dibinə çökdükdə pürrəngi çay artıq süfrəyə verilməyə tam hazır olur./Demokrat.az
