Dövlət universitetlərinə qəbul olunan tələbələr üçün həm bakalavr, həm də magistratura səviyyəsində təhsil tam pulsuz olacaq.
Referans Media Gürcüstan mətbuatına istinadən xəbər verir ki, bu barədə məlumat ali təhsil haqqında qanun dəyişikliyi paketində əks olunub və layihə deputatlara Parlamentin İdman Komitəsinin iclasında təhsil nazirinin müavini Zviad Qabisonia tərəfindən təqdim edilib.
Nazir müavinin sözlərinə görə, ölkədə fəaliyyət göstərən bütün 19 dövlət universitetində təhsil tam şəkildə dövlət tərəfindən maliyyələşdiriləcək.
Zviad Qabisonia bildirib ki, ali təhsil sahəsində təhsili tam pulsuz edirik. Bu, dövlət universitetlərində tam maliyyələşdirmə modelinə keçidi nəzərdə tutur. Mövcud qrant sistemi ləğv olunur və onun əvəzinə dövlət tərəfindən 100%-lik maliyyələşdirmə tətbiq ediləcək.
Nazir müavini diqqətə çatdırıb ki, universitetlərinə kvota prinsipi ilə qəbul olunan tələbələr həm bakalavr, həm də magistratura səviyyəsində tamamilə pulsuz təhsil alacaqlar.
Yeni modelə görə, dövlət ali məktəblərində oxumağa başlayan tələbələrin təhsil haqqı tam olaraq dövlət büdcəsi hesabına ödəniləcək.
