Ölkənin heyvandarlıq sahəsində bugünkü iflic vəziyyəti Kənd Təsərrüfatı Nazirliyinin yarıtmaz fəaliyyətinin göstəricisidir. Problem
heç vaxt birdən-birə yaranmır, “dama-dama göl olur”. Respublikaya xaricdən mal-qara, qoyun-keçi gətirilirsə, buna nə ad vermək
olar? Məlum olub ki, hətta fermerlərə məşğulluq proqramı çərçivəsində ayrılan heyvanlar da ölkə xaricindən gətirilir. Özü də çox
uzaqdan yox, qonşu Gürcüstandan. Sual yaranır: Gürcüstanın iqlim şəraitinin, təbiətinin Azərbaycandan elə bir fərqiolmadığı
təqdirdə nə səbəbə onlarda heyvandarlıq inkişaf edib, bizdə isə yerində sayır? Axı bizdə də fermalar var, yeniləri də yaradılıb. Örüş
sahələri, otlaqlar da az deyil.Coğrafi şəraitimiz bu sahədə hər cür inkişafa nail olmağa imkan verir. Bəs niyə dayanmadan
geriləyirik? Heyvanların sayını artırmaq, maldan, qoyundan bala almaq bu qədər çətin olub? Bir zamanlar hər kənddə, qəsəbə
baytar həkimlər olurdu. İndi kənddə kənd təsərrüfatı mütəxəssisi tapmaq müşkül işə çevrilib. Yəqin fikirləşirlər ki, xaricdən
hazır inəkdən, danadan gətiririksə, baytar həkimə, mütəxəssisə heç ehtiyac da qalmır. Xaricdən hansısa damazlıq, südlük cins
heyvanı gətirmək olar. Həmişə belə təcrübə olub.
Amma keçmişdə bu heyvandarlıq sahəsinin inkişafı üçün olub. Daha bunu mal bazarını doldurmaq üçün etməyiblər. İndi isə özlərini əziyyətə salmamaq üçün işin asan
yolunu tapıblar. Alıb gətirməklə problem həll olunursa, onda dövlətin büdcəsindən milyonlarla manat pul ayırıb Kənd Təsərrüfatı Nazirliyini saxlamağa nə ehtiyac var?
Nazirlik rayonlarda bəzi səlahiyyət sahibləri, qoluzorlular kəndlinin otlaq yerlərini ələ keçirdib oranı əkinçilik üçün ayıranda heç bir münasibət bildirmirsə, onda bu nazirlik nəyə lazımdır? Nazirlik adlı qurum müəyyən sahəyə dövlət nəzarətini həyata keçirmək üçün yaradılır.
Kənd Təsərrüfatı Nazirliyi isə hərəkətsizliyi, ona həvalə olunan sferada dönüş yarada bilməməsi ilə lazımsızlığını sübuta yetirir.
Yaxşı ki, heyvan dil açıb söz deyə bilmir, yoxsa hələ çox nöqsanlar üzə çıxardı. Vaxtilə ala inək, qaşqa inəyə nəğmələr,
bayatılar qoşduğumuz halda, indi aqrar sektorumuzun başbilənlərinin biliksizliyi sayəsində o adrenalini də yaşaya bilmirik…
Sima Babayeva
