Müğənni Tuğba Ekinci həbs olunmasından sonra ilk dəfə açıqlama verib. Əxlaqsız məzmun yayılması ilə bağlı istintaq çərçivəsində həbs edilən sənətçi ittihamları rədd edib və “Bu ölkədə gözəl olmaq cinayətdirmi?” sualı ilə diqqət çəkib. O, ödənişli abunə hesabının olmadığını, paylaşdığı görüntülərin isə evdə idman etdiyi anlara aid olduğunu bildirib.
Referans Media xəbər verir ki, Kızılcahamam Respublika Baş Prokurorluğunun koordinasiyası ilə beş şəhərdə əxlaqsız məzmunla bağlı istintaq çərçivəsində eyni vaxtda əməliyyat keçirilib. İnternetdə əxlaqsız məzmun yaydığı ehtimal edilən şəxslər arasında müğənni Tuğba Ekinci də olub. Türkiyə Cinayət Məcəlləsinin 226-cı maddəsi üzrə məhkəməyə çıxarılan Ekinci iş materialları və güclü cinayət şübhəsi ilə bağlı qiymətləndirmədən sonra həbs edilib.
Müğənni məhkəmədəki müdafiəsində Instagram hekayələrində paylaşdığı görüntülərin evində idman etdiyi anlara aid olduğunu bildirib. O, videonun nümayiş məqsədi daşımadığını, bəzi hissələrinin isə kontekstdən çıxarılaraq yayıldığını iddia edib.
Ekinci həmçinin həmin görüntülərdən maddi qazanc əldə etmədiyini vurğulayıb və videonun bütöv şəkildə araşdırılmasını istəyib.
Həbsdə olan müğənninin ictimaiyyətə çatdırıldığı bildirilən açıqlamasında ailəsinin də baş verənlərdən ciddi təsirləndiyi qeyd olunub. Xüsusilə 80 yaşlı anasının yaşananlardan mənəvi zərər gördüyünü deyən Ekinci ittihamları qəbul etmədiyini bildirib.
Müğənninin açıqlamasında bu ifadələr yer alıb: “İyirmi ildən artıq sənət həyatımı qürurla davam etdirmişəm. Qazilərimizin və şəhid ailələrinin yanında heç bir qarşılıq gözləmədən səhnəyə çıxmışam. Bu gün isə kontekstdən çıxarılaraq yayılan bikinili videoya görə, heç bir konkret sübut olmadan həbsdə saxlanılıram. Bu ölkədə gözəl olmaq cinayətdirmi? Heç bir ödənişli abunə hesabım yoxdur, heç kimdən bir qəpik belə almamışam. Qadınlığımı və gözəlliyimi pul qarşılığında istifadə etmək xarakterimə uyğun deyil. Heç kim mənim namusuma ləkə yaxa bilməz. 80 yaşlı anam bu prosesdə dərindən sarsılıb. Cənab Prezidentin, cənab Ədliyyə nazirinin və dəyərli hakimlərin prosesin tezliklə aydınlaşdırılmasına həssaslıq göstərəcəklərinə ürəkdən inanıram. Türk ədalətinə etibarım tamdır”.
Qeyd edək ki, bunlar Tuğba Ekinciyə aid olduğu bildirilən açıqlamada səsləndirilən fikirlərdir. İttihamların hüquqi qiymətləndirilməsi isə istintaq və məhkəmə prosesinin nəticələrindən asılıdır.
