Türkiyə Ankara üçün istehsal olunmuş altı F-35 qırıcı təyyarəsinin təhvil verilməsi ilə bağlı ABŞ ilə danışıqları davam etdirir və müdafiə sektorunda əməkdaşlığı məhdudlaşdıran Amerika sanksiyalarının aradan qaldırılacağına ümid edir.
Referans Media xəbər verir ki, Türkiyə Müdafiə Nazirliyinin həftəlik mətbuat brifinqindən sonra yayımladığı açıqlamada "Ölkəmiz üçün istehsal olunan altı F-35 qırıcı təyyarəsinin tədarükü ilə bağlı ABŞ hakimiyyəti ilə əlaqələrimiz davam edir", - deyə qeyd olunub.
Ankara həmçinin Vaşinqtonu CAATSA qanunu çərçivəsində tətbiq edilən sanksiyaları ləğv etməyə, eləcə də Türkiyənin müdafiə sənayesinə qarşı bütün birbaşa və dolayı məhdudiyyətləri aradan qaldırmağa çağırıb. Nazirlik bu tədbirləri müttəfiq münasibətlərinin prinsipləri ilə uyğunsuz hesab edir və iki ölkənin qarşılıqlı maraqları nəzərə alınmaqla vəziyyətin əlverişli həllinə ümid etdiyini bildirib.
ABŞ, Ankaranın Rusiyanın S-400 yer-hava raket sistemlərini aldıqdan sonra 2020-ci ildə Türkiyəyə qarşı sanksiyalar tətbiq etdi. 2019-cu ildə Vaşinqton, Rusiya hava hücumundan müdafiə sistemləri və Amerika gizli qırıcılarının birgə istifadəsinin təyyarənin gizli texnologiyalarını təhlükəyə ata biləcəyindən narahatlığını bildirərək, Türkiyəni F-35 proqramından çıxardı./Teleqraf
