Instagram, yeniyetmələrin intihar və ya özünə zərər vermə ilə bağlı məzmunu ardıcıl axtarması halında valideynlərə bildiriş göndərəcək. Yeni funksiya əvvəlcə Avstraliya, Kanada, Böyük Britaniya və ABŞ-da “valideyn nəzarəti” alətindən istifadə edən ailələr üçün aktiv olacaq.
Sistem qısa müddətdə təkrarlanan həssas axtarışları aşkar etdikdə valideynləri xəbərdar edəcək və onlara övladları ilə bu mövzuda necə danışmaq barədə mütəxəssis resursları təqdim edəcək. Şirkətin açıqlamasına görə, bu cür məzmun axtarıldıqda nəticələr məhdudlaşdırılır və istifadəçilər yardım xətlərinə yönləndirilir.
Meta Platforms sözçüsü Sophie Vogel bildirib ki, ilin sonuna qədər yeniyetmələrin süni intellekt vasitəsilə apardığı və özünə zərər mövzulu dialoqlar da valideynlərə bildiriləcək.
Bu addım sosial media platformalarına qarşı artan hüquqi təzyiqlər fonunda atılıb. Los-Ancelesdə 1.600-dən çox iddiaçının iştirak etdiyi məhkəmə prosesində YouTube, TikTok və Snap Inc. ilə birlikdə Instagram yeniyetmələri asılı hala salmaqda ittiham olunur.
