ABŞ ilə danışıqlar aparan nümayəndə heyətinin rəhbəri və İran Parlamentinin (Məclis) sədri Məhəmməd Baqer Qalibaf bildirib ki, ABŞ Prezidenti Donald Trampın atəşkəs rejimini uzatması yalnız İran üzərindəki dəniz blokadası ləğv edildikdə və Livanda döyüşlər tamamilə dayandırıldıqda məntiqli olur.
Maraqlıdır, İran üzərində dəniz blokadasının ləğvi tələbi nə qədər realdır və bu, danışıqlar prosesinə necə təsir edə bilər? Bu bəyanat İranın danışıqlardakı strategiyasının sərtləşdiyini göstərirmi?
Referans Media xəbər verir ki ,Siyasi şərhçi Ülviyyə Zülfiqar Sfera.az-a açıqlamasında bildirib ki, İranın dəniz blokadasının ləğvini əsas şərt kimi irəli sürməsi real baxımdan çətin görünür. Onun sözlərinə görə, belə blokadalar adətən hərbi və siyasi təzyiq aləti kimi istifadə olunur və Tramp administrasiyası bu amildən asanlıqla imtina etməyəcək:
“Üstəlik, Livanda döyüşlərin tam dayandırılması kimi paralel şərtin qoyulması danışıqları daha da mürəkkəbləşdirir. Bu, əslində, təkcə ABŞ ilə deyil, daha geniş regional aktorlarla bağlı məsələdir və prosesin çoxşaxəli olduğunu göstərir. Bu tələb danışıqlara təsir baxımından iki istiqamətdə işləyə bilər. Bir tərəfdən, İran mövqeyini sərtləşdirərək daha çox güzəşt əldə etməyə çalışır. Digər tərəfdən isə bu cür maksimalist şərtlər danışıqları uzada və ya dalana dirəyə bilər. Yəni rəsmi Tehran həm təzyiq yaradır, həm də risk edir ki, bu halda proses ümumiyyətlə nəticəsiz qala bilər”.
Siyasi şərhçi vurğulayıb ki, bu bəyanatı tam qapalı və kompromisssiz xətt kimi də qiymətləndirmək düzgün olmaz:
“Daha çox danışıqlar öncəsi üstünlük qazanmaq cəhdi kimi görünür. Bu isə beynəlxalq danışıqlarda tez-tez istifadə olunan taktikalardan biridir”.
