Erzurumun Yakutiye rayonunda, psixoloji problemləri olduğu iddia edilən 73 yaşlı M.A.-nın evindən tonlarla çöp çıxarılıb.
Referans Media xəbər verir ki, vətəndaşların verdiyi şikayətlər əsasında hadisə yerinə gələn Yakutiye Bələdiyyəsinin əməkdaşları zirzəmidəki mənzildə geniş təmizləmə və boşaltma işlərinə başlayıblar. Çirkabın yaratdığı güclü iy və ətrafda narazılıqların artması, əməliyyatın sürətlə aparılmasına səbəb olub.
Təmizlik zamanı mənzilə daxil olmaq çətin olsa da, təxliyyə əməliyyatı nəticəsində tonlarla tullantı çıxarılıb. İşlər 3 gün ərzində intensiv və diqqətlə həyata keçirilib.
Tamamilə boşaldılmış mənzildə, xalq sağlamlığını qorumaq məqsədilə dezinfeksiya və dərmanlama işləri aparılıb. Təmizlik tamamlandıqdan sonra ev M.A.-nın yaxınlarına təhvil veriləcək. Qonşular isə uzun müddətdir narahatlıq yaratmış iy və sağlamlıq riskinin aradan qalxmasından rahat nəfəs alıblar.
