Şimali Koreya lideri ABŞ ilə İran arasında artan gərginlik fonunda diqqətçəkən açıqlama verərək, vasitəçilik etməyə hazır olduğunu bildirib. O, iki ölkə arasındakı böhranın həlli üçün diplomatik kanalların açıq saxlanılmasının vacibliyini vurğulayıb.
Referans Media xəbər verir ki, Kim Çen In “ABŞ Prezidenti ilə istənilən vaxt görüşə bilərəm. Dünya sülhə ehtiyac duyur” ifadəsini işlədib. Bu bəyanat beynəlxalq ictimaiyyətdə yeni diplomatik təşəbbüs ehtimalı kimi qiymətləndirilib.
Paylaşılan görüntülərdə Şimali Koreya liderinin qlobal gərginliklərin azaldılmasının önəminə diqqət çəkdiyi və birbaşa təmaslara hazır olduğunu bildirdiyi görünür. Bu çıxışın xüsusilə ABŞ–İran xəttində yeni diplomatik prosesə yol aça biləcəyi qeyd olunur.
O, həmçinin Koreya yarımadasındakı təhlükəsizlik siyasətinə toxunaraq, “Bölgəmizdə xarici silahlara icazə verməyəcəyik” mesajını verib. Bu bəyanat regional təhlükəsizlik balansı və qlobal güc mübarizəsi kontekstində diqqət çəkib.
Ekspertlər bu açıqlamanı Şimali Koreyanın beynəlxalq diplomatiyada daha fəal rol alma cəhdi kimi qiymətləndirir və ABŞ–İran gərginliyindən asılı olaraq yeni görüşlərin gündəmə gələ biləcəyini bildirirlər.
