Qlobal maliyyə bazarlarında həftənin ən mühüm hadisələrindən biri Yaponiya Mərkəzi Bankının faiz qərarı olub. Tənzimləyici qurum əsas faiz dərəcəsini 25 baza bəndi artıraraq 1 faizə yüksəldib.
Referans Media xəbər verir ki, bununla da Yaponiyada faizlər təxminən son 30 ilin ən yüksək səviyyəsinə çatıb. Uzun illər aşağı faiz siyasəti ilə tanınan ölkənin bu addımı beynəlxalq bazarlarda diqqətlə izlənib.
Analitiklərin fikrincə, qərar ümumi bazar gözləntilərinə uyğun olsa da, Yaponiya kimi iqtisadiyyatda faizlərin bu səviyyəyə qalxması investorların qlobal pul siyasəti ilə bağlı baxışlarını yenidən formalaşdırmağa başlayıb.
Qərardan sonra bazarlarda əsas diqqət ABŞ Federal Ehtiyat Sisteminin (FED) bu həftə açıqlayacağı faiz qərarına yönəlib. İnvestorlar xüsusilə inflyasiya, iqtisadi artım və gələcək faiz siyasəti ilə bağlı veriləcək mesajları izləyir.
Eyni zamanda enerji bazarlarında da diqqətçəkən dəyişikliklər yaşanıb. ABŞ–İran gərginliyinin azalması fonunda Brent neftinin qiymətində geriləmə qeydə alınıb.
Digər tərəfdən, qızıl qiymətlərində artım müşahidə olunub, ABŞ-ın 10 illik istiqraz gəlirləri isə nisbətən sabit qalıb.
Kriptovalyuta bazarında da ehtiyatlı optimizm davam edir. Ekspertlər hesab edir ki, yaxın günlərdə mərkəzi bankların qərarları və makroiqtisadi göstəricilər investorların davranışına əsas təsir edən amillər olacaq.
Bazar iştirakçıları indi qlobal maliyyə istiqamətini müəyyən edə biləcək növbəti əsas siqnalı FED-dən gözləyir.
