Türkiyə hökuməti bufet və serpme (kiçik boşqablarda səhər yeməyinin verilməsi) üçün yeni qaydalar tətbiq etməklə hotel və restoranlarda qida israfını məhdudlaşdırmağı planlaşdırır.
Referans “Sabah” qəzetinə istinadən xəbər verir ki, Prezident yanında Kənd Təsərrüfatı və Ərzaq Siyasəti Şurası yaxın vaxtlarda müvafiq qanun layihəsini parlamentə təqdim etməyi planlaşdırır.
Qeyd olunur ki, Türkiyə hotellərində “hər şey daxil” sisteminin alakartla əvəzlənməsi təklif edilir. Bu, qonaqların yalnız nə yeyəcəklərini seçib sifariş verəcəyi bir formatdır.
Tullantıların qarşısının alınması Fondunun (TİSVA) məlumatına görə, Türkiyədə hər il təxminən 23 milyon ton ərzaq itkisi baş verir və meyvə-tərəvəzin 35 faizi süfrəyə çatmır. Buna görə də hökumət ərzaq tullantılarının miqyasını azaltmaq istəyir. Nəşr çörəyə xüsusi diqqət yetiriləcəyini vurğulayıb. Jurnalistlər qeyd ediblər ki, Türkiyədə hər il təxminən 4,38 milyard ədəd çörək atılır.
Türkiyə hökuməti həmçinin evsiz heyvanlar üçün küçəyə yemək atmağı qadağan etməyi planlaşdırır, çünki bu, şəhərləri çirkləndirir və bakteriya yayır. Əvəzində yemək qalıqlarının mərkəzləşdirilmiş qaydada sığınacaqlara köçürülməsi təklif edilir. Bundan əlavə, restoranlarda müştərilərin hər bir şəxs üçün mütləq şəkildə yemək sifariş etməsi tələbinin də qadağan olunması təklif edilir. Təklif qəbul olunsa, məsələn, üç ziyarətçi yalnız iki nəfərlik səhər yeməyi yeyə biləcək.
