Ardahan ilə Posof arasında yerləşən İlqar Dağı keçidində güclü qar həyatı iflic edib.
Referans Media xəbər verir ki, aprel ayının son günlərinə baxmayaraq, bölgədə davam edən qar yağışı nəticəsində bəzi yerlərdə qar qalınlığı yol kənarındakı yol nişanlarının hündürlüyünü belə keçib.
İlqar Dağı (2550 metr yüksəklik) ərazisində hava şəraiti xüsusilə ağırlaşıb. Qarın intensivliyi səbəbindən yol boyu görmə məsafəsi azalır, sürücülər isə çətinliklə hərəkət edir.
Bölgədən keçən sürücülərdən biri vəziyyəti belə təsvir edib: “Aprel ayının sonu olmasına baxmayaraq, burada qış tam gücü ilə davam edir. Qar qalınlığı artıq yol nişanlarını belə keçib.”
Buna baxmayaraq, yolun hazırda açıq olduğu, lakin vəziyyətin tez dəyişə biləcəyi bildirilir.
Aidiyyəti qurumlar yolların bağlanmaması üçün fasiləsiz qar təmizləmə və nəzarət işləri aparır. Havanın sərtliyi səbəbindən sürücülərə ehtiyatlı olmaları tövsiyə edilir.
