Türkiyənin sevilən sənətçilərindən Hüseyn Kağıt Konyada verdiyi konsert zamanı gözlənilməz vəziyyətlə üzləşib. Konsertin gedişində elektrik enerjisinin kəsilməsinə baxmayaraq, sənətçi peşəkarlığını nümayiş etdirərək çıxışını davam etdirib.
Referans Media xəbər verir ki, Ankara havalarının tanınmış ifaçısı Hüseyn Kağıt səhnəni tərk etmək əvəzinə mahnılarını mikrofon və səs sistemi olmadan canlı ifa etməyə davam edib. Sənətçinin bu davranışı tamaşaçılar tərəfindən böyük rəğbətlə qarşılanıb.
Konyada musiqisevərlərlə görüşən Hüseyn Kağıtın konserti zamanı qəfil elektrik kəsintisi baş verib. Səs sistemlərinin və işıqlandırmanın dayanması qısa müddətli təəccüb yaratsa da, sənətçi vəziyyətə soyuqqanlı yanaşıb. O, səhnədə qalaraq ifasını davam etdirib və tamaşaçılarla birlikdə konsert ab-havasını qoruyub.
Hüseyn Kağıt mahnılarını akustik şəkildə səsləndirərkən, konsert iştirakçıları da telefonlarının işıqlarını yandıraraq sənətçiyə dəstək olublar. Musiqisevərlər ifaçıya birlikdə oxuyub və həmin anlar konsertin ən yaddaqalan görüntülərindən birinə çevrilib.
Sənətçinin elektrik kəsintisinə baxmayaraq səhnədə qalması və çıxışını davam etdirməsi həm tamaşaçıların, həm də sosial media istifadəçilərinin diqqətini çəkib.
