Tanzaniyanın şimalında yerləşən qorunan təbiət ərazisində və UNESCO-nun Dünya İrsi siyahısına daxil olan bölgədə 10 aslanın ölümü ilə bağlı zəhərlənmə ehtimalı araşdırılır.
Referans Media xəbər verir ki, hadisə "Ngorongoro Conservation Area" ərazisinin Ndutu hissəsində baş verib. Aslanların cəsədləri cümə günü aşkar edilib.
Ərazini idarə edən Ngorongoro Conservation Area Authority tərəfindən verilən açıqlamada ilkin araşdırmaların heyvanların zəhərli maddə qəbul etməsi nəticəsində ölmüş ola biləcəyini göstərdiyi bildirilib.
“İlkin nəticələr heyvanların zəhər qəbul etdikdən sonra həyatını itirmiş ola biləcəyini göstərir”, – deyə qurumun açıqlamasında qeyd olunub.
Hazırda aslanların ölümünün dəqiq səbəbini müəyyənləşdirmək üçün araşdırma aparılır.
Bu ərazidə aslanlarla yanaşı fillər, qara kərgədanlar və digər vəhşi heyvanlar da yaşayır. Eyni zamanda bölgədə yarımköçəri həyat tərzi sürən Masai maldar icmaları ilə vəhşi təbiət arasında sıx təmas mövcuddur.
Mütəxəssislər bildirirlər ki, vəhşi heyvanlarla insanlar arasındakı qarşıdurmalar belə bölgələrdə əsas təhlükələrdən biridir.
International Union for Conservation of Nature (IUCN) aslanları “həssas növ” kimi təsnif edir.
Təşkilatın məlumatına görə, dünyada aslanların sayı azalmaqda davam edir. Bu növ üçün əsas təhlükələr arasında yaşayış mühitlərinin itirilməsi, ov heyvanlarının azalması və insanlarla vəhşi təbiət arasındakı münaqişələr göstərilir.
