ABŞ administrasiyasının İsrailin yüksək vəzifəli İran rəsmilərinə qarşı mümkün sui-qəsd planlarının diplomatik prosesi poza biləcəyindən narahat olaraq Tehranı dolayı kanallarla əvvəlcədən xəbərdar etdiyi iddia olunub.
Referans Media xəbər verir ki, bu barədə "Vaşinqton Post" hazırkı və keçmiş ABŞ rəsmilərinə istinadən məlumat yayıb.
Məlumata görə, Vaşinqton xüsusilə İranın xarici işlər naziri Abbas Əraqçi və parlament sədri Məhəmməd Baqir Qalibafın hədəfə alınmasına qarşı çıxıb. Bildirilir ki, Tramp administrasiyası yaz aylarında vasitəçilər üzərindən Tehrana xəbərdarlıq mesajı göndərərək mümkün hücumların diplomatik danışıqları təhlükə altına sala biləcəyini çatdırıb.
Adının açıqlanmasını istəməyən ABŞ rəsmisi bildirib ki, İranlı danışıqlar aparan şəxslərin öldürülməsi diplomatik həll imkanlarını zəiflədər:
"Əgər bu şəxslər öldürülsə, praqmatik qüvvələr də aradan qalxmış olacaq."
Qəzetin iddiasına görə, ABŞ administrasiyası mart ayından etibarən İsrail rəsmilərinə də İranın siyasi rəhbərliyinə qarşı sui-qəsd cəhdlərinin dayandırılması ilə bağlı mesajlar göndərib.
Məqalədə qeyd olunur ki, Vaşinqtonun Tehranı birbaşa xəbərdar etməsi ABŞ ilə İsrail arasında İran məsələsində ciddi fikir ayrılıqlarının olduğunu göstərir.
ABŞ Dövlət Departamentinin sabiq rəsmisi Aaron David Miller hesab edir ki, tərəflərin strateji məqsədləri artıq fərqlənir. Onun sözlərinə görə, İsrail rəhbərliyi mümkün diplomatik prosesləri pozmağa daha meyilli görünür. Ağ Ev rəsmisi isə nəşrə açıqlamasında Prezident Donald Trampın "sülh prosesinin davam etməsini istədiyini" bildirib.
"Vaşinqton Post" həmçinin yazır ki, ABŞ və İsrail ilkin mərhələdə İranda rejim dəyişikliyi hədəfini bölüşsələr də, sonradan Vaşinqton İran hakimiyyətinin mövqeyini qoruyacağını qiymətləndirdiyi üçün tərəflərin yanaşmaları fərqlənməyə başlayıb.
Qəzet daha bir iddia irəli sürərək bildirir ki, İsrailin mart ayında İranın yüksək vəzifəli milli təhlükəsizlik rəsmisi Əli Laricanini öldürməsi Vaşinqtonla Təl-Əviv arasında fikir ayrılıqlarını daha da dərinləşdirib. Bu iddialarla bağlı rəsmi qurumlar tərəfindən müstəqil təsdiq verilməyib.
