Real Madrid ciddi idman böhranı yaşayır. Klub rəhbərliyi Xabi Alonsonu göndərərək baş məşqçi postuna Alvaro Arbeloanı gətirsə də, “Albacete” ilə kubok oyunu vəziyyətin daha da ağırlaşacağından xəbər verir. Bu prosesdə diqqət mərkəzinə düşən futbolçular arasında Arda Güler də yer alır. Milli futbolçunun performansındakı eniş, Dünya Kuboku play-off mərhələsi ərəfəsində narahatlıq doğurur.
Referans Media xəbər verir ki, “Eflatun-ağlar”ın heyətində bir sıra oyunçular tənqid olunur, lakin əsas fokus Arda Güler və Franco Mastantuono üzərində cəmlənib. Klubun gələcək layihələrinin simvolu kimi görülən bu iki gənc futbolçu “Albacete” qarşısında oynanan görüşdən sonra yenidən sual işarələri ilə gündəmə gəlib.
Real Madrid bu iki futbolçu üçün böyük sərmayə yatırıb. Mastantuono 63,2 milyon avroya, Arda Güler isə 20 milyon avroya transfer olunub. Böyük ümidlərə baxmayaraq, indiyədək nə stabil performans, nə də davamlı inkişaf müşahidə olunur.
Arda Güler üçün “sarı həyəcan” mərhələsi
Arda Gülerlə bağlı vəziyyət hələlik “sarı alarm” səviyyəsində qiymətləndirilir. Onun istedadı danılmazdır, lakin mövcud oyun sistemi və ona verilən məsuliyyət futbolçunu çətin vəziyyətə salır. Xüsusilə komandanın oyun qurucusu rolunun hazırda Arda üçün ağır olduğu görünür.
“Albacete” matçının statistik göstəriciləri də bunu təsdiqləyir:
Pas dəqiqliyi: %87 – orta xəttdə ən aşağı göstərici
Son üçlük zonasında dəqiqlik: %82
Buna baxmayaraq, 5 qol fürsəti yaradaraq bu göstəricidə komandanın ən yaxşısı olub . Bu rəqəmlər oyun qurucusu mövqeyində çıxış edən futbolçu üçün yetərli hesab edilmir.
Milli komanda üçün risk artır
Türkiyə millisinin Dünya Kuboku play-off oyunları yaxınlaşdıqca Arda Gülerdə müşahidə olunan forma itkisi narahatlıq yaradır. Hakan Çalhanoğlunun tez-tez zədələnməsi, komandanın yükünü daha da artırır. Hazırda sabit performans göstərən yeganə futbolçu Kenan Yıldızdır. Vaxt isə sürətlə azalır.
Əsas narahatlıq: Franco Mastantuono
Əgər Arda Güler üçün hələ ümid qalırsa, Franco Mastantuono Real Madrid üçün daha ciddi risk kimi dəyərləndirilir. Argentinalı futbolçu uzun müddətdir oyundan kənar təsir bağışlayır, təşəbbüsdən və cəsarətdən uzaq görünür.
“Albacete” matçında:
Cəmi 1 zərbə (o da qol oldu)
Yalnız 2 uğurlu driblinq
Bu göstəricilər komanda yoldaşı David Jiménezin statistikasından iki dəfə aşağıdır.
83 milyon avroluq sual işarəsi
Elit futbolda bəhanələr qəbul edilmir, xüsusilə də söhbət 83 milyon avrodan artıq sərmayə qoyulan iki gənc futbolçudan gedirsə. Böyük gələcək vəd edən Arda Güler və Franco Mastantuononun üzərindəki qara buludlar hələlik dağılacaq kimi görünmür.
