Fransada artıq bir həftədir davam edən yuxarı sinif şagirdlərinin etirazları getdikcə daha gərgin xarakter alır. Aksiyalar zamanı baş verən qarşıdurma və iğtişaşlarda 76 nəfər xəsarət alıb, ölkə üzrə yüzlərlə təhsil müəssisəsinin fəaliyyəti pozulub.
Referans Media bildirir ki, bu barədə Fransanın milli təhsil naziri Eduard Jefre RTL radiosunun efirində məlumat verib.
Nazirin sözlərinə görə, onu şagirdlərin tələblər irəli sürməsi deyil, aksiyalar zamanı zorakılığın artması narahat edir.
“Məni yuxarı sinif şagirdlərinin tələblər irəli sürməsi narahat etmir. Məni zorakılıq narahat edir. Etirazlar başlayandan bəri 76 nəfər yaralanıb, onlardan 18-i təhsil müəssisələrinin əməkdaşlarıdır”, – nazir bildirib.
Fransada məktəblilər artıq bir həftədir dərs cədvəllərinin həddindən artıq yüklənməsinə, müəllim çatışmazlığına və təhsil sistemindəki digər problemlərə etiraz edirlər.
Aksiyalar bəzi şəhərlərdə iğtişaşlar və yanğınlarla müşayiət olunub. “Tələbələr İttifaqı”nın məlumatına görə, çərşənbə axşamı Fransa üzrə 10-a yaxın universitet və 400-dən çox lisey bloklanıb.
Beləliklə, əvvəlcə təhsil sistemindəki problemlərə etiraz kimi başlayan aksiyalar bir sıra yerlərdə zorakılıq və qarşıdurmalarla müşayiət olunan geniş etiraz dalğasına çevrilib./Musavat.com/
