Türkiyədə hakimlərlə bağlı aparılan araşdırmada yeni saxlanılmalar həyata keçirilib.
İstanbul Respublika Baş Prokurorluğunun Qanunsuz Mərc və İdman Cinayətləri Bürosunun koordinasiyası ilə aparılan “Hakimlər işi” üzrə araşdırma çərçivəsində Super Liqa hakimi Yasin Kol və Super Liqa köməkçi hakimi Göktuğ Hazar Erel saxlanılıb.
Referans Media xəbər verir ki, hakimlərə qarşı irəli sürülən ittihamlar arasında 7258 saylı qanuna müxalifət, rəsmi sənədlərin saxtalaşdırılmasında iştirak və vəzifədən sui-istifadə yer alır. Yasin Kol "Trabzonspor"–"Drogheda Yunayted" matçında hakimlik etdikdən dərhal sonra saxlanılıb. Super Liqada köməkçi hakim kimi fəaliyyət göstərən Göktuğ Hazar Erel də eyni araşdırma çərçivəsində nəzarətə götürülüb.
İstanbul Respublika Baş Prokurorluğunun açıqlamasında bildirilib ki, Mərkəzi Hakimlər Komitəsinin sədri və digər şübhəlilərlə bağlı aparılan araşdırma zamanı saxlanılan şəxslərdən götürülmüş rəqəmsal materialların araşdırılması və Maliyyə Cinayətlərinin Araşdırılması Şurasının (MASAK) məlumatlarının təhlili nəticəsində Yasin Kol və Göktuğ Hazar Erel barəsində də araşdırma aparılıb. Açıqlamaya əsasən, iki hakim 7258 saylı qanuna müxalifət, sənədlərin saxtalaşdırılmasında iştirak və vəzifədən sui-istifadə ilə bağlı iddialar əsasında saxlanılıb.
Araşdırmada Yasin Kolun saxlanılma səbəblərindən biri kimi göstərilən 7258 saylı qanuna müxalifət maddəsinin qanunsuz mərc fəaliyyəti ilə əlaqəli olduğu bildirilib. İstintaq çərçivəsində Kolun pul köçürmələrinin məbləği və istiqamətinin qanunsuz mərc fəaliyyəti ilə bağlı ola biləcəyinin müəyyən edildiyi qeyd olunub. Bu məlumatların hüquqi qiymətləndirilməsi isə araşdırmanın nəticələrindən asılıdır.
İstanbul Emniyyətinin Maliyyə Cinayətləri ilə Mübarizə Şöbəsinin əməkdaşları tərəfindən həyata keçirilən əməliyyat İstanbul Respublika Baş Prokurorluğunun Qanunsuz Mərc və İdman Cinayətləri Bürosunun koordinasiyası ilə aparılıb. Araşdırma çərçivəsində açıq mənbə məlumatları, MASAK və HTS analizləri, zərərçəkmiş və şahid ifadələri, eləcə də ekspert rəyləri əsasında Mərkəzi Hakimlər Komitəsinin sədri Ferhat Gündoğdu və bəzi hakim və müşahidəçilərin mümkün cinayət əlaqələrinin araşdırıldığı bildirilib.
İlk əməliyyat zamanı İstanbul, Ankara, Elazığ və Manisada müəyyən edilən ünvanlara basqınlar keçirilib. Əməliyyat nəticəsində Mərkəzi Hakimlər Komitəsinin sədri Ferhat Gündoğdu, Türkiyə Futbol Federasiyası Fəal Hakimlər Dərnəyinin sədri Ferdi Karadoruk, keçmiş Mərkəzi Hakimlər Komitəsinin sədr müavini Ahmet Şahin, keçmiş komitə üzvü Yunus Yıldırım, TFF Təhsil və 4-cü Region üzrə məsul şəxs Sebahattin Şahin, TFF Hakimlər və Müşahidəçilər Dərnəyinin İstanbul şöbəsinin təşkilati məsul şəxsi Alican Sağlar və TFF Hakimlər və Müşahidəçilər Dərnəyinin İstanbul İl Hakimlər Komitəsinin sədri Emre Kosif saxlanılmışdı.
Hazırda Yasin Kol və Göktuğ Hazar Erelin də saxlanılması ilə bağlı araşdırmanın davam etdiyi bildirilir.
