Türkiyə Futbol Federasiyası (TFF) Süper Liqa yayımlanan gəlirin paylaşımında tarixi bir dəyişiklik edib. Keçmişdə çempion olan klublara verilən və gəlirin 11%-ni təşkil edən “Çempionluq Payı” gələcək mövsümdən etibarən bütün komandalar arasında bərabər paylanacaq. Bu mövsüm “Çempionluq Payı” son dəfə veriləcək və 6 klub cəmi 718 milyon lirə (14 milyon avro) qazanacaq. Anadolu klubları isə gələcək mövsümdən minimum 40 milyon lirə əlavə gəlir əldə edəcək.
Referans Media xəbər verir ki, TFF İdarə Heyətinin qərarına görə, yayım gəlirinin paylaşılmasında əsas meyarlardan biri olan və keçmiş mövsümlərdə çempionluq qazanan 6 klub arasında paylanan “Çempionluq Payı” bu mövsüm son dəfə tətbiq olunacaq. Gələcək mövsümdən etibarən bu pay bütün komandalar arasında bərabər bölüşdürüləcək.
Yayım gəlirlərində bərabərlik artırılır
Yeni sistemə görə, yayım gəlirinin 48%-i bütün komandalar arasında bərabər paylanacaq. Keçmişdə gəlirin paylaşımı belə həyata keçirilirdi:
37% – bütün komandalar arasında bərabər (iştirak haqqı)
46% – oyun nəticələrinə görə (qələbə və ya heç-heçə)
11% – keçmiş çempionluqlarına görə paylanan “Çempionluq Payı”
6% – liqada ilk 6 sırada bitirən komandalar arasında pay
Yeni sistemlə 11%-lik “Çempionluq Payı” da bərabər şəkildə bütün komandalar arasında paylanacaq və ümumi bərabərlik 48%-ə yüksələcək.
2024-cü ildə Süper Liqa yayım haqqı 3 mövsümlüyə 180 milyon ABŞ dolları müqabilində satılıb. Bu mövsüm mart ayı üçün “Çempionluq Payı” 718 milyon lirə (14 milyon avro) təşkil edəcək. Bu məbləğ keçmiş 69 mövsümün çempionları arasında paylanacaq və hər çempionluq üçün 10,4 milyon lirə qazanc təmin olunacaq.
Mövsüm üzrə Çempionluq Payı gəlirləri:
Qalatasaray: 260 milyon lirə (5,1 milyon avro)
Fənərbaxça: 197,6 milyon lirə (3,8 milyon avro)
Beşiktaş: 166,4 milyon lirə (3,2 milyon avro)
Trabzonspor: 72,8 milyon lirə (1,4 milyon avro)
Bursaspor: 10,4 milyon lirə (202 min avro)
Başakşəhər: 10,4 milyon lirə (202 min avro)
Anadolu klubları minimum 40 milyon lirə əlavə gəlir əldə edəcək
2024-cü ildə yayım haqqı 180 milyon dollar olaraq müəyyənləşdirilib. Türk lirəsi ilə ödəniş isə inflyasiya nəzərə alınaraq artırılacaq. Həmçinin, gələcəkdə valyuta məzənnəsində baş verə biləcək dəyişikliklər də məbləğə əlavə olunacaq.
Buna görə də gələcək mövsümdə “Çempionluq Payı” bütün 18 klub arasında bərabər paylanacaq və hər klub minimum 40 milyon lirə qazanacaq. Anadolu klubları bu dəyişiklikdən əlavə gəlir əldə edərək maliyyə vəziyyətlərini gücləndirəcəklər.
