İqtisadi Əməkdaşlıq Təşkilatının (İƏT)
17-ci sammiti Xankəndi şəhərində keçiriləcək. 3-4 iyul tarixlərində İƏT-ə üzv
ölkələrin liderləri Qarabağda bir araya gələcəklər.
Xankəndidə sammitə hazırlıq işləri davam edir.
Küçə və prospektlərdə, tədbirin keçiriləcəyi tarix və məkanı əks
etdirən plakatlar yerləşdirilib. Yol infrastrukturu yenidən qurulur. Yollara
asfalt örtüyü çəkilir. Bir çox yaşayış binası və ictimai obyektlər əsaslı şəkildə
təmir olunur.
Şəhərdə təhlükəsizlik tədbirləri gücləndirilib. Şəhər sakinləri
beynəlxalq iqtisadi toplantının Xankəndidə təşkilini əlamətdar hadisə kimi dəyərləndirirlər.
Bu tədbir həm də 30 ildən çox separatizmə yuva olmuş Xankəndini diqqət mərkəzinə
gətirir. Xankəndidə baş tutacaq 17-ci sammitdə üzv dövlətlər arasında iqtisadi əlaqələrin
inkişafı, bölgənin gələcəyi ilə yanaşı, dünyada baş verən son hadisələr də
müzakirə olunacaq.
Görüşün detalları ilə bağlı politoloq Əziz
Əlibəyli Referans-a açıqlamasında danışıb.
“Unutmaq
lazım deyil ki, İqtisadi Əməkdaşlıq Təşkilatı 60-cı illərdə, dünyanın soyuq
müharibə ilə toqquşduğu dövrlərdə Türkiyənin, Azərbaycanın və İranın – üç ölkənin
bir güc mərkəzi kimi yaradılmış bir qurum olub. İkinci mərhələdə bir də belə
baxmaq lazımdır ki, bu gedişatdan sonrakı dövrlərdə Azərbaycan müstəqilliyini əldə
etdikdə bu region gücü kimi təmsil olunmağımıza imkan verdi. 17-ci Zirvə
görüşünün Xankəndidə keçirilməsi böyük bir hadisədir. Ən azından ona görə ki,
separatizmin kökünün kəsilməsi müasir dünyaya yaxşı olar. Bəlkə də başqa bir
formada ərazi bütövlüyümüzü leqallaşdırmaq üçün möhtəşəmdir. İkinci tərəfdən bu
ölkələrin bir-biri ilə münasibətlərə indi daha çox ehtiyyacları var. Üçüncü mərhələdə
İranın hansısa iddialarını nəzərə almasaq, görə bilərik ki, Türkiyə və Pakistan
Azərbaycanın hərbi-strateji müttəfiqləridir”.
Politoloq
qeyd edib ki, bu görüşün Rusiya ilə yaranan gərginlik dövrünə düşməsinin də
xüsusi əhəmiyyəti var.
“Bu
görüş Rusiya ilə yaşanan hadisələr fonunda baş verir. Ona görə də bunu Azərbaycana
göstərilmiş həmrəylik aktı kimi də nəzərdən keçirə bilərik. Bəlkə də belə
olması daha doğrudur. Bu doğrular içərisində Azərbaycanın güclü regional müttəfiqlərinin
olması məsələsi də gündəmə gətirilir. Bu, Azərbaycanın tək olmaması məsələsinə
bağlanılır. Davamında bu təmsilçilik özündə İran tərəfini də əks etdirir”.
Fidan
Vəlisoy
