"Bitcoin" son dörd həftəni ardıcıl olaraq artımla başa vursa da, kriptovalyuta bazarında investorların diqqəti ABŞ Federal Ehtiyat Sisteminin (FED) faiz qərarına yönəlib. Zəifləyən institusional tələb, aşağı ticarət həcmi və makroiqtisadi qeyri-müəyyənlik fonunda "Bitcoin"in yeni istiqaməti FED-in qərarından və bazarın bu qərarı necə qiymətləndirəcəyindən asılı ola bilər.
Referans Media xəbər verir ki, "Bitcoin" həftəni 1,05 faiz yüksəlişlə tamamlayaraq apreldən bəri ilk dəfə ardıcıl dörd müsbət həftəlik bağlanış edib. BTC çərşənbə axşamı 66 990 dollar səviyyəsinə yüksəlsə də, qısamüddətli investorların zərərsizləşmə səviyyəsinə yaxın satışlarından sonra üç sessiyada 4,87 faiz geriləyib.
"Bitfinex Alpha"nın hesabatına görə, qısamüddətli investorların orta alış qiyməti təxminən 68 500 dollar səviyyəsində formalaşıb. Bu səbəbdən həmin zona "Bitcoin" üçün mühüm müqavimət həddi hesab olunur.
Hesabata əsasən, "BTC"nin 68 000-68 500 dollar aralığını davamlı şəkildə keçməsi üçün bazara yeni tələbin daxil olması lazımdır.
"Bitcoin"ə institusional marağın da son dövrdə zəiflədiyi bildirilir. CME-də "Bitcoin" fyuçersləri üzrə açıq mövqelərin həcmi 6 milyard dollardan aşağı düşüb. BTC opsionlarında açıq mövqelər isə 408 milyon dollara geriləyib. Bu, 2023-cü ilin sentyabrından bəri qeydə alınan ən aşağı göstərici kimi qiymətləndirilir.
ABŞ-da spot "Bitcoin" ETF-ləri ardıcıl üçüncü həftəni də xalis vəsait daxilolması ilə başa vurub. Həftəlik ümumi daxilolma 33,9 milyon dollar təşkil etsə də, cümə axşamı və cümə günlərində ETF-lərdən ümumilikdə 465,2 milyon dollar vəsait çıxıb.
“BlackRock”ın IBIT fondu da bərpa dövründən sonra ilk dəfə həftəni xalis çıxışla tamamlayıb. Fond üzrə həftəlik çıxışın 95,5 milyon dollar olduğu bildirilib.
Faiz dərəcələri kriptovalyuta bazarına birbaşa təsir edən əsas makroiqtisadi amillərdən biridir. FED-in daha sərt pul siyasətini davam etdirməsi dollar və istiqraz gəlirlərini dəstəkləyə, nəticədə riskli aktivlərə, o cümlədən "Bitcoin"ə marağı zəiflədə bilər.
Əksinə, faizlərin azaldılması və ya FED-in gələcəkdə daha yumşaq pul siyasətinə keçəcəyi ilə bağlı mesaj verməsi investorların risk iştahını artıra və kriptovalyuta bazarına əlavə vəsait axınına şərait yarada bilər.
Hazırda bazar iştirakçıları FED-in faiz qərarı ilə yanaşı, qurumun qarşıdakı aylarda pul siyasətinin istiqaməti ilə bağlı verəcəyi siqnalları da diqqətlə izləyirlər.
"Bitfinex Alpha"nın qiymətləndirməsinə görə, aşağı likvidlik, zəifləyən institusional axınlar və makroiqtisadi qeyri-müəyyənlik "Bitcoin"in hazırda 63 000-68 500 dollar aralığında hərəkət etməsinə səbəb olur.
ABŞ-da yüksələn dizel yanacağının qiymətinin daşınma və istehsal xərclərini artıraraq inflyasiyanı yüksək səviyyədə saxlaya biləcəyi ilə bağlı narahatlıqlar da bazarın diqqətindədir.
Bundan əlavə, ABŞ-ın 10 illik real istiqraz gəlirliliyi iyulun 23-də 2,43 faizə yüksəlib.
Beləliklə, "Bitcoin"in yaxın müddətdə istiqaməti yalnız texniki göstəricilərdən deyil, həm də FED-in faiz qərarından, inflyasiya gözləntilərindən və institusional investorların bazara qayıdıb-qayıtmayacağından asılı olacaq.
