Gəncədə çay evində baş verən mübahisə qanla bitib.
Referans Media-nın yerli bürosunun məlumatına görə, hadisə şəhərin Atatürk prospektində yerləşən çay evlərindən birində qeydə alınıb.
Dava zamanı Gəncə sakinləri, 2005-ci il təvəllüdlü Adil Kazımov və onun həmyaşıdı İ.İbrahimov bıçaq xəsarətləri alıblar. Hər iki gənc bədənin kəsilmiş-deşilmiş yarası diaqnozu ilə xəstəxanaya çatdırılıb.
Yaralılara ilkin tibbi yardım göstərilib. Onların vəziyyətlərinin stabil olduğu bildirilir.
İlkin ehtimala görə, mübahisə zamanı 21 yaşlı iki gənc bir-birinə xəsarət yetirib.
Hadisənin dəqiq səbəbləri araşdırılır.
