ABŞ təhlükəsizlik və kəşfiyyat rəsmiləri Yaxın Şərqdə davam edən müharibə fonunda mümkün terror təhlükələri ilə bağlı ciddi xəbərdarlıq edib. Bildirilir ki, xüsusilə Tel Aviv, Qüds və Qatar ərazilərində intihar hücumları ehtimalı nəzərdən keçirilir.
Referans Media xəbər verir ki, bu təhdidlərin bölgədə artan gərginlik və İranın dəstəklədiyi qrupların fəallaşması ilə əlaqəli olduğu vurğulanır.
ABŞ mənbələrinin məlumatına görə, təhlükə həm İsrail daxilindəki iri şəhərləri, həm də ABŞ-ın hərbi mövcudluğu və müttəfiqlərinin yerləşdiyi strateji nöqtələri əhatə edə bilər. Rəsmilər xüsusilə insanların sıx toplaşdığı məkanlarda mümkün hücum riskinin artdığını bildirirlər.
Vaşinqton administrasiyası bölgədə kəşfiyyat məlumatlarının paylaşımını və təhlükəsizlik tədbirlərini gücləndirib.
2024-cü ildə Tel Aviv şəhərinin Lehi küçəsində baş vermiş partlayış zamanı hücumu törədən şəxs ölüb, bir mülki şəxs isə yaralanmışdı. Hadisədən sonra təhlükəsizlik səviyyəsi artırılmışdı.
Hamas və İslami Cihad kimi qrupların oxşar taktikaları yenidən gündəmə gətirməsi ilə bağlı məlumatlar təhlükəsizlik orqanlarını daha da ehtiyatlı olmağa vadar edir. Xüsusilə İordan çayının qərb sahilində vəziyyətin həssas olduğu qeyd olunur.
ABŞ rəsmilərinin xəbərdarlığı müharibənin təkcə hərbi hədəflərlə məhdudlaşmadığını, mülki əhalinin sıx yaşadığı şəhər mərkəzlərinin də risk altında ola biləcəyini göstərir. 2000-ci illərin əvvəllərində İsraildə baş vermiş intihar hücumları ağır itkilərə səbəb olmuşdu və təhlükəsizlik qurumları oxşar ssenarinin təkrarlanmasından narahatdır.
Ekspertlər hesab edirlər ki, bölgədə gərginlik artdıqca və münaqişə uzandıqca qeyri-ənənəvi hücum riskləri də yüksəlir. ABŞ və müttəfiqləri isə bu təhdidlərin qarşısını almaq üçün regional müdafiə və kəşfiyyat əməkdaşlığını daha da gücləndirməyə çalışır.
