"Fənərbaxça"nın satın alma opsiyasını istifadə etməməsindən sonra Edson Alvarez karyerasında gözlənilməz bir böhranla üzləşib. İstanbul təcrübəsi başa çatan Meksikalı futbolçu, geri döndüyü "Vest Hem Yunayted"in Premyer Liqadan düşməsi ilə daha da çətin vəziyyətə düşüb.
"Fənərbaxça" rəhbərliyi, Edson Alvarezin müqaviləsində yer alan satın alma opsiyasını aktivləşdirməyərək futbolçu ilə yolları ayırıb. Bu qərarın ardından 26 yaşlı yarımmüdafiəçi müqavilə ilə bağlı olaraq "Vest Hem Yunayted"a geri qayıdıb.
Lakin İngiltərəyə dönüş onun üçün yaxşı xəbərlə başlamayıb. "Vest Hem Yunayted" mövsümün sonunda Premyer Liqada qalmağı bacarmayıb və nəticədə alt liqaya düşərək "Çempionşip"ə enib. Bu vəziyyət Alvarezin gələcəyini də ciddi şəkildə qeyri-müəyyən edib.
İngiltərə mətbuatının iddialarına görə, futbolçu aşağı liqada oynamaq istəmir və klubdan ayrılmaq variantını nəzərdən keçirir. "Vest Hem Yunayted"ın isə maliyyə balansı və yüksək maaş səbəbilə oyunçunu satmağa müsbət yanaşdığı bildirilir.
"Fənərbaxça"da isə Alvarez qısa müddət ərzində 18 oyunda meydana çıxıb, 1 assistlik performans sərgiləyib.
Beləliklə, "Fənərbaxça"dan ayrıldıqdan sonra Edson Alvarez üçün karyera planları daha da çətinləşib. "Vest Hem Yunayted"ın alt liqaya düşməsi futbolçunun gələcəyini sual altına salarkən, növbəti transfer dönəmində yeni bir ayrılıq ehtimalı gündəmdə qalır.
